Apelau Bandio Treth Gyngor
Os ydych yn credu bod bandio eich eiddo ar gyfer y Dreth Gyngor yn anghywir, dylech gysylltu ag Asiantaeth y Swyddfa Brisio (VOA) yn y lle cyntaf cyn cysylltu â'r Tribiwnlys Prisio. Y VOA sy'n pennu lefel y gwerth y seilir biliau arni; ac felly, dylid rhoi cyfle iddynt edrych ar y mater cyn ei godi gyda ni. Gallwch ddarganfod sut i gysylltu â'r VOA trwy eu prif dudalen we:
Valuation Office Agency - GOV.UK (www.gov.uk)
Mae gan y VOA ddyletswydd i sicrhau bod y band cywir wedi'i osod ar eich eiddo chi. Os ydynt yn cael eu perswadio gan yr hyn rydych chi'n ei ddweud, byddant yn newid y gwerth - waeth pa bryd byddwch yn cysylltu â nhw neu am ba hyd rydych wedi byw yn yr eiddo neu'n berchen arno. Fodd bynnag, os nad ydynt yn derbyn yr hyn rydych chi'n ei ddweud ac rydych yn dymuno dilyn materion yn bellach, gosodir terfynau amser ar ba bryd y medrwch wneud cynnig ysgrifenedig ffurfiol i "newid y rhestr brisio". Gallwch wneud hyn o fewn chwe mis i ddod yn Dalwr Treth Gyngor i'r eiddo neu o fewn chwe mis i'r VOA yn newid gwerth yr eiddo (os nad ydych yn cytuno â'r newid hwnnw).
Os bydd cynnig ffurfiol dilys wedi'i wneud, mae gan y VOA 4 mis i geisio datrys y mater cyn bod rhwymedigaeth arnynt i gyflwyno llythyr penderfynu ffurfiol neu i roi gwybod i chi na fedrant ddod i benderfyniad o fewn y terfyn amser hwn. Os ydych yn derbyn llythyr penderfynu gan y VOA neu os ydynt wedi methu â chyhoeddi penderfyniad o fewn 4 mis, mae gennych 4 mis arall i apelio'n uniongyrchol i'r Tribiwnlys Prisio. Gallwch ddefnyddio ein porth electronig i apelio yn erbyn eich band Treth Gyngor neu ddefnyddio ein ffurflen apelio; gellir dod o hyd i ddolenni i'n porth a'r ffurflen apelio isod.
Byddwn yn cydnabod derbyn eich apêl, a bydd y gydnabyddiaeth yn eich cyfeirio at y canllawiau ar y wefan hon sy'n dweud wrthych sut byddwn yn symud pethau ymlaen.
Fel arfer, rydym yn rhestru apelau o fewn chwe mis i'w derbyn er y gall fod modd datrys eich apêl gyda'r VOA o hyd. Anelwn at roi rhybudd 10 wythnos i chi am unrhyw wrandawiad.
Mynnwch gip ar ein tudalennau Canllaw a Chwestiynau Cyffredin am ragor o wybodaeth ddefnyddiol.
